Waziri wa Nchi, Ofisi ya Rais, Menejimenti ya Utumishi ya Utumishi wa Umma na Utawala Bora, Mhe. George Simbachawene amezindua Bodi mpya ya Wakurugenzi ya Taasisi ya UONGOZI huku akiisisitiza Bodi hiyo kuzingatia misingi thabiti iliyowekwa na Bodi iliyomaliza muda wake ili kufikia malengo ya uanzishwaji wa Taasisi hiyo.

Mhe. Simbachawene amesema Taasisi ya UONGOZI ilianzishwa kama kituo cha kikanda ambacho lengo lake ni kuimarisha uwezo wa viongozi wa Afrika kusimamia maendeleo endelevu ya Bara la Afrika.

Mhe. Simbachawene amezindua Bodi hiyo leo tarehe 28 Novemba, 2024 jijini Dar es Salaam.

Amesema kulingana na wasifu wa wajumbe wa Bodi hiyo mpya ya Wakurugenzi ana imani kuwa italeta mitazamo isiyo na kifani kwa Taasisi ya UONGOZI.

Kutokana na malengo ya uanzishwaji wa Taasisi ya UONGOZI, ni lazima bodi iwe na hadhi ya kimataifa na kutambuliwa jambo ambalo ndilo hitaji la Hati ya Kuanzisha Taasisi hiyo.

Mhe. Simbachawene amewapongeza wajumbe wapya wa Bodi kwa kuaminiwa na kuteuliwa. Aidha, amemshukuru Rais wa Jamhuri ya Muungano wa Tanzania Mhe. Dkt Samia Suluhu Hassan kwa kuteua bodi yenye mchanganyiko wa watu wa mataifa mbalimbali na kuamini kuwa itakuwa na kitu kipya ili kufikia malengo ya kuanzishwa kwa taaisi hiyo.

Ameongeza kuwa, Wakurugenzi wa Bodi waliotangulia waliweka misingi ya Taasisi kustawi. “Hivi ndivyo uongozi bora ulivyo. Tunapowapongeza wakurugenzi wapya kwa uteuzi wao unaostahili, tunawashukuru wakurugenzi waliopita kwa kazi nzuri na kwa kutumikia muda wao kwa uadilifu.” Mhe. Simbachawene amesisitiza.

Amesema Serikali ya Tanzania inatambua umuhimu wa uongozi na maendeleo ya uongozi katika maendeleo endelevu ya Tanzania na Bara la Afrika na ndio maana imeendelea kuunga mkono maendeleo ya Taasisi ya UONGOZI.

Vile vile ameishukuru Serikali ya Finland kwa kuunga mkono na kushirikiana na Tanzania katika kuiendeleza Taasisi ya UONGOZI kwa kipindi cha miaka kumi na minne iliyopita ambao umechangia mafanikio makubwa ya Taasisi hiyo.

Amesema, pamoja na wadau mbalimbali wanaochangia maendeleo ya Taasisi ya UONGOZI Serikali ya Tanzania na Finland zimechangia kwa kiasi kikubwa maendeleo ya taasisi hiyo.

Kwa upande wake Mwenyekiti wa Bodi ya Wakurugenzi ya Taasisi ya UONGOZI, Balozi Ombeni Sefue amemshukuru Rais Mhe. Dkt. Samia Suluhu Hassan kwa kuwaamini na kuwateua katika bodi hiyo na amemshukuru Waziri Simbachawene kwa kuwazindulia Bodi hiyo.

Balozi Sefue, amesema bodi hiyo ambayo ni ya tano itaendeleza kazi ya bodi iliyomaliza muda wake ambayo iliweka mkakati wa muda mrefu unaoongoza kazi ya taasisi na mkakati huo una Idhini ya Serikali, hivyo inachukua pale walipoachia bodi iliyopita kuhakikisha mkati unatekelezwa na kufikia malengo ya taasisi.