Naibu Katibu Mkuu, Ofisi ya Rais, Menejimenti ya Utumishi wa Umma na Utawala Bora, Bi. Prisca Lwangili, amewataka watumishi wa Ofisi hiyo kujitathmini, kujitambua na kuelewa haiba za wenzao ili kuimarisha mahusiano na ushirikiano kazini kwa lengo la kuongeza ufanisi katika utekelezaji wa majukumu yao.

Bi. Lwangili ameyasema hayo leo, Oktoba 26, 2026, wakati akihitimisha mafunzo kuhusu Haiba kwa watumishi wa Ofisi hiyo, yaliyofanyika katika eneo maalumu la Ofisi hiyo, Mji wa Serikali Mtumba jijini Dodoma.

“Ni muhimu kwa kila mtumishi kujitathmini na kujifunza tabia za wengine ili kujenga mahusiano mazuri kazini, kuimarisha ushirikiano na kuongeza ufanisi katika utekelezaji wa majukumu,” amesema Bi. Lwangili.

Amesisitiza kuwa kujitambua na kuelewa haiba za wengine husaidia kurahisisha mawasiliano, kupunguza migogoro na kujenga mazingira bora ya kazi yanayozingatia kuheshimiana na kushirikiana.

Kwa upande wake, mwezeshaji ambaye ni Afisa kutoka Idara ya Usimamizi wa Utendajikazi, Ofisi ya Rais, Menejimenti ya Utumishi wa Umma na Utawala Bora, Bw. Oswin Mkinga, amesema haiba ya mtumishi hujidhihirisha kupitia tabia, mwenendo, nidhamu, uadilifu, mawasiliano na namna anavyohusiana na wengine.

Aidha, amesisitiza umuhimu wa watumishi kujitambua, kudhibiti hisia na kuheshimu maoni ya wengine ili kuimarisha mahusiano kazini, kuongeza ufanisi na kuboresha huduma kwa wananchi.